వెట్‌ మంచూరియన్‌|Telugu Vanitha Vantalu

వెట్‌ మంచూరియన్‌ :-

కావలసినవి:-

క్యాబేజి తరుగు - రెండు కప్పులు, క్యారెట్‌- రెండు (సన్నగా కోరాలి), అల్లంవెల్లుల్లి పలుకులు - రెండుచెంచాల చొప్పున, పచ్చిమిర్చి - రెండు (చిన్నగా తరగాలి), ఉల్లిపొరక- అరకట్ట (సన్నగా కోయాలి), మొక్కజొన్నపిండి - అరకప్పు, మైదా- చెంచా, ఉప్పు - తగినంత, కారం - చెంచా, నూనె - వేయించేందుకు సరిపడా
సాస్‌ కోసం కావలసినవి: ఉల్లిపొరక - అరకట్ట, అల్లం - చిన్నముక్క, వెల్లుల్లి రెబ్బలు - ఐదారు, పచ్చిమిర్చి - రెండు, కారం - అరచెంచా, టమాట, సోయాసాస్‌- మూడుచెంచాల చొప్పున, మొక్కజొన్నపిండి - చెంచా (కొద్దిగా నీరు పోసి చిక్కని మిశ్రమంలా కలపాలి), నీళ్లు - కప్పు, ఉప్పు - తగినంత, నూనె - నాలుగుచెంచాలు.

తయారీ:-

ముందుగా క్యాబేజి తరుగు, మొక్కజొన్న పిండి, క్యారెట్‌, ఉల్లిపొరక ముక్కలు, ఉప్పు, మైదా, అల్లం, వెల్లుల్లి పలుకులు విడిగా ఓ పాత్రలోకి తీసుకుని బాగా కలపాలి. అవసరమైతేనే నీళ్లు వాడాలి. ఈ పిండిని చిన్నచిన్న ఉండల్లా చేసి బంగారువర్ణంలోకి వచ్చేదాకా నూనెలో వేయించాలి.
ఇప్పుడు సాస్‌ తయారీ చూద్దాం: బాణలిలో కొద్దిగా నూనె వేడిచేసి అల్లం, సన్నగా తరిగిన ఉల్లిపొరక కాడల్ని వేయించాలి. నిమిషమయ్యాక ఉప్పు, కారం, టమాటా, సోయా సాస్‌ కలపాలి. దీనికి కప్పునీళ్లు ఆ తర్వాత ముందుగా కలిపి పెట్టుకున్న మొక్కజొన్న పిండి పేస్టును చేర్చాలి. కాస్త చిక్కగా అవుతున్నప్పుడు వేయించిన ఉండల్ని ఇందులో కలిపి దింపేయాలి. అలంకరణకు ఉల్లిపొరక ముక్కలు, కొత్తిమీర తరుగు చల్లాలి.